Аб’яўлены сбор на рэстаўрацыю славутага абраза ў Ваўкалаце — аднаго з арыгіналаў Езуса Міласэрнага

Збор ладзіць кс. Анджэй Бульчак, які пасля 14 год служэння у Віцебскай дыяцэзіі быў аштрафаваны за антываенны ролік і быў вымушаны выехаць з Беларусі, у якога выклікае занепакоенасць стан іконы.

Абраз, які знаходзіцца ў вёсцы Ваўкалта на Докшыншчыне, унікальны. Гэта адзін з эскізаў абраза Езуса Міласэрнага, які выяўляе Хрыста паводле аб’яўленняў, якія атрымала с. Фаўстына Кавальская. Стан іконы выклікае занепакоенасць, таму пачаў збор на яго рэстаўрацыю.

Ён знаходзіцца ў Ваўкалаце з 1939 г. Яго гісторыя такая. С. Фаўстына, атрымаўшы аб’яўленні Хрыста, замовіла абраз Езуса Міласэрнага ў мастака Яўгена Казіміроўскага. Гэты твор стаў вядомы ва ўсім свеце і цяпер ён знаходзіцца ў алтары санктуарыя Божай Міласэрнасці ў Вільні. Мастак да стварэння канчатковай версіі іконы зрабіў яшчэ два эскізы, якія не задаволілі с. Фаўстыну. Адзін з іх у выніку паехаў у дом Кангрэгацыі сясцёр Маці Божай Міласэрнасці ў Варшаве, дзе быў знішчаны ў пажары падчас вайны. А другі — апынуўся ў касцёле ў невялічкай, схаванай ад вялікіх дарог, на некалькі соцень жыхароў вёсцы Ваўкалата.

Эскіз абраза Езуса Міласэрнага трапіў туды з ініцыятывы кс. Міхала Сапоцькі, спаведніка с. Фаўстыны. Ён ахвяраваў абраз свайму сябру, тагачаснаму пробашчу кс. Рамуальду Дронічу ў 1939 г. са словамі: «Калі будзеце маліцца каля гэтага абраза малітвай, якой вас навучу, то савецкія ўлады касцёл не зачыняць». Так і атрымалася. Парафіяне падтрымлівалі культ і святыня няспынна дзейнічала ў абставінах савецкага пераследу. Амаль заўсёды там нёс служэнне святар.

Гэтую гісторыю пацвердзіла і найстарэйшая парафіянка ў Ваўкалаце спадарыня Валянціна Францаўна Штура. Жанчына адзначыла, што гэты абраз сапраўды быў прывезены з Вільні напрыканцы 1930-ых гадоў, і што з пасляваенных часоў у парафіі моляцца Вяночак да Божай Міласэрнасці (прадыктаваны с. Фаўстыне падчас аб’яўленняў).

У сваю чаргу кс. Кшыштаф Пажарскі, які шмат гадоў нясе пастырскую паслугу ў краінах былога Савецкага Саюза, адмыслова наведаўшы Ваўкалату, падкрэсліў, што знаходжанне там эскіза знакамітай іконы з’яўляецца «таямніцай Божага Провіду і патрабуе дапаўнення гісторыі культа Божай Міласэрнасці». Святар дадаў, што «для Касцёла на Беларусі гэта сапраўдны схаваны скарб, які трэба дастаць на паверхню».

Пра тое, што абраз патрабуе аднаўлення, яшчэ ў 2020 г. казаў пробашч парафіі ў Ваўкалаце кс. Алег Півавар. Сёння пасадзейнічаць рэстаўрацыі можна з дапамогай ініцыятывы zrzutka.pl, праз якую ўжо сабрана 2150 злотых з патрэбных 10 тысяч. Магчыма, рэнавацыя ваўкалацкага абраза стане пачаткам пашырэння яго культу, які ў сваю чаргу прынясе цудоўны плён.

Фота: абраз Езуса Міласэрнага ў Ваўкалаце, ave-maria.by