Заява рабочай групы Каардынацыйнай рады “Хрысціянская візія”
Арганізацыя"Хрысціянская візія"
Міжканфесійнае аб’яднанне беларускіх хрысціян, створанае на хвалі мірных пратэстаў 2020 г.
Інфармацыя пра «Хрысціянскую візію» Аб'ява аб заснаванні групы Місія групы Іншыя артыкулы
Заява рабочай групы Каардынацыйнай рады “Хрысціянская візія”
11 верасня 2020 года
Рабочая група Каардынацыйнай рады “Хрысціянская візія” — гэта нефармальнае міжканфесійнае аб’яднанне чальцоў Каардынацыйнай рады, створанае імі 9 верасня дзеля супольнай дзейнасці хрысціян у рэалізацыі мэты Рады — пошуку шляхоў для пераадолення палітычнага крызісу ў Рэспубліцы Беларусь і забеспячэння згоды ў грамадстве на падставе Канстытуцыі. Мы лічым неабходным аднаўленне ў краіне міру, вяршэнства права і дэмакратыі, павагі да правоў і свабод чалавека і чалавечай годнасці. Мы падзяляем думку пра неабходнасць:
1. Неадкладнага спынення гвалту, спынення палітычнага пераследу з боку ўладаў і правядзення расследавання таго, што адбылося, у адпаведнасці з заканадаўствам.
2. Вызвалення ўсіх палітычных зняволеных, адмены незаконных судовых пастаноў, выплаты кампенсацый усім пацярпелым.
3. Прызнання выбараў 9 жніўня 2020 года несапраўднымі. Правядзення новых выбараў паводле міжнародных стандартаў з новым складам усіх выбарчых камісій, уключаючы Цэнтральную камісію.
Акрамя таго, рабочая група “Хрысціянская візія” звяртае ўвагу на шматлікія парушэнні права грамадзян на свабоду рэлігіі ці перакананняў, а таксама на палітычна матываваны пераслед рэлігійных дзеячаў і супольнасцяў.
У прыватнасці, мы адзначаем:
— непасрэдны ціск дзяржаўных органаў на святароў і супрацоўнікаў Беларускай Праваслаўнай Царквы, якія размяшчалі ў сваіх сацыяльных сетках карцінку “Праваслаўныя супраць фальсіфікацый, прыніжэння асобы і ціску на асобу”, а таксама допісаў у падтрымку мітрапаліта Тадэвуша Кандрусевіча;
— ціск дзяржаўных органаў на святароў і супрацоўнікаў царкоўных арганізацый Беларускай Праваслаўнай Царквы праз яе кіраўніцтва — за размяшчэнне ў сваіх сацыяльных сетках карцінкі “Праваслаўныя супраць фальсіфікацый, прыніжэння асобы і ціску на асобы”, іншых допісаў з выказываннем свайго меркавання пра недапушчальнасць фальсіфікацыі прэзідэнцкіх выбараў, гвалту супраць мірных грамадзян з боку сілавых структур і парушэння правоў і свабод чалавека;
— стварэнне дзяржаўнымі органамі перашкод для ажыццяўлення рэлігійнай дзейнасці святарамі (у прыватнасці, адкліканне 4 верасня дазволу на ажыццяўленне рэлігійнай дзейнасці кс. Ежы Вільку, пробашчу парафіі Святога Міхала Арханёла ў вёсцы Варапаева Пастаўскага раёну Віцебская вобласці), якія мы лічым ціскам на рэлігійную арганізацыю;
— стварэнне перашкод для дзейнасці рэлігійных супольнасцяў, у прыватнасці блакаванне выхадаў з касцёла Святых Сымона і Алены ў горадзе Мінску (Чырвонага касцёла), якое адбылося 26 жніўня, а таксама самавольная замена замкоў у гэтым касцёле, якая адбылася 31 жніўня.
— незаконную забарону ўезду ў Рэспубліку Беларусь 31 жніўня кіраўніка Рымска-каталіцкага Касцёла ў Беларусі арцыбіскупа Тадэвуша Кандрусевіча, якая не толькі стала парушэннем гарантаванага міжнароднымі абавязаннямі (Міжнародны пакт аб грамадзянскіх і палітычных правах, арт. 12), Канстытуцыяй (арт. 30) і заканадаўствам Рэспублікі Беларусь (Закон Рэспублікі Беларусь № 49-3 ад 20 верасня 2009 г. «Пра парадак выезду з Рэспублікі Беларусь і ўезду ў Рэспубліку Беларусь грамадзянаў Рэспублікі Беларусь», арт.3) права на вяртанне ва ўласную краіну, але і ціскам на рэлігійнага лідара персанальна і рэлігійную грамаду ў цэлым.
Мы выказваем салідарнасць з усімі ахвярамі палітычнага пераследу ў краіне, заклікаем дзяржаўныя ўлады да неадкладнага спынення гвалту і пачатку дыялогу з грамадзянскай супольнасцю.
Мы ўпэўнены, што Цэрквы могуць зрабіць пазітыўны ўнёсак у пераадоленне крызісу і ў спрыянне такому дыялогу.
Група “Хрысціянская візія” будзе весці ўлік усіх выпадкаў палітычнага пераследу, які праяўляецца ў абмежаваннях свабоды рэлігіі і веравызнання, а таксама інфармаваць пра такія выпадкі міжнародную супольнасць.
Мы заклікаем міжнародную хрысціянскую супольнасць і Цэрквы да салідарнасці з беларускім народам.
