Хрыстос нарадзіўся!

25 снежня католікі, пратэстанты, а таксама праваслаўныя вернікі з 10 Памесных Цэркваў святкуюць Нараджэнне Хрыстова.

Хрысціяне вераць, што Бог стаў чалавекам, каб чалавек стаў Богам. Чалавек для Бога настолькі каштоўны, што Ён дзеля нашага вызвалення з палону граху Сам прыйшоў на зямлю як безабароннае Дзіцятка. На іконах, карцінах, паштоўках мы бачым, як ляжыць у яслях кволае Немаўля, Якому наканавана ў будучыні праліць за людзей Сваю Кроў і рушыць за чалавекам аж у пекла.

Бог паважае чалавечую годнасць. І калі мы называем сябе хрысціянамі — то мы павінны імкнуцца быць падобнымі да Бога, шануючы чалавека.

Нашы грамадзянскія перакананні — паслядоўны працяг нашай хрысціянскай ідэнтычнасці. Новая Беларусь у разуменні группы «Хрысціянская візія» — гэта прастора свабоды веравызнання і адначасова прастора, дзе па-хрысціянску паважаецца чалавек, яго правы на жыццё, бяспеку, развіццё, самарэалізацыю.

У гэты ўрачысты дзень мы молімся аб усіх, хто за сваю мару жыць у Новай Беларусі знаходзяцца за кратамі, а таксама за тых, хто быў вымушаны ўцякаць ад пераследу «у Егіпет» — за межы Радзімы.

Мы віншуем усіх хрысціян і іншых людзей добрай волі, для якіх сённяшні дзень — святочны, і разам са здароўем і сіламі жадаем веры, надзеі і любові.

«Дух Госпада Бога на мне, бо Гасподзь памазаў Мяне звеставаць убогім, паслаў Мяне ацаляць зламаных сэрцам, прапаведаваць палонным вызваленне і вязням — адкрыццё цямніцы, прапаведаваць год Гасподні спрыяльны», — кажа Збаўца (Іс. 61:1-2). Няхай надыходзячы 2022 год стане спрыяльным для спраў праўды!

З Нараджэннем Хрыстовым!