Кандрусевіч: Шушкевіч прабіваў шлях да нашай незалежнасці

“Я не дазволю каб свет смяяўся з Беларусі. Я хачу каб свет гаварыў пра Беларусь толькі добра”, — прыгадаў словы першага кіраўніка краіны арцыбіскуп Тадэвуш падчас пахавальнай Імшы.

“8 снежня 1991 у Віскулях адбыўся новы пачатак новай гісторыі нашай краіны. Там быў ты, спадар Станіслаў. Ты быў творцам дакументу дзякуючы якому мы атрымалі незалежнасць”, — сказаў мітрапаліт на пенсіі, — “Сёння мы развітваемся з першым кіраўніком незалежнай Беларусі. Чалавекам які стаяў ля вытокаў гэтай незалежнасці і які тварыў гэтую незалежнасць. Ён пакінуў глыбокі след у нашай гісторыі”.

Падчас св. Імшы прамаўляў таксама мітрапаліт Станеўскі. “Жыццё спачылага Станіслава прыпала на перыяд вялікіх пераменаў у нашай Бацькаўшчыне і ва ўсім свеце. Гэта быў час вялікіх выпрабаванняў і вялікіх надзей”, — сказаў ён.

Іерархі падзякавалі Шушкевічу за спрыянне Касцёлу ў вяртанні святыняў і рэлігійную свабоду ў Беларусі.

Кандрусевіч прыгадаў гісторыю з 1990 г. калі Шушкевіч спрыяў перадачы будынку сённяшняй духоўнай семінарыі ў Гродне. “Мы пайшлі да Станіслава Станіслававіча. Я яму прадставіў усю справу — нам патрэбна семінарыя і Касцёл не можа адрадзіцца без сваіх святароў і без семінарыі. Ён тады сказаў словы якія заўсёды памятаю: “Я не дазволю каб свет смяяўся з Беларусі. Я хачу каб свет гаварыў пра Беларусь толькі добра”. Станіслаў Станіслававіч, мы сёння дзякуем табе за тыя словы. Яны змянілі нашу гісторыю. Мы ўвайшлі ў тую семінарыю і на сёння з яе выйшлі больш за 200 святароў”, — сказаў былы Мінска-Магілёўскі мітрапаліт.

“Сёння мы дзякуем табе за адкрытасць, за захаванне права на рэлігійную свабоду, якое з’яўляецца адным з галоўных праў чалавека. Бог стварыў чалавека свабодным”, — сказаў Кандрусевіч.