Малітвы з-за кратаў ад Валерыі Чарнаморцавай

Праваслаўная хрысціянка, удзельніца групы «Хрысціянская візія» Валерыя Чарнаморцава была затрыманая 18 кастрычніка 2022 і тры месяцы правяла ў зняволенні. Інтэрв’ю з ёй — на нашым сайце. Са зняволення яна змагла вынесці перапісаныя ў сшытак малітвы, якімі моляцца ў СІЗА на Валадарскага. Прапануем гэтыя малітвы і для вас.

Малітва 1.

Госпадзі, прашу цябе за нашу Беларусь, за супакой і еднасць паміж людзьмі, аб міры і любові адзін да аднаго.

Дабраславі нашу Бацькаўшчыну. Спашлі Духа Святога на слугаў Тваіх, якія мусяць кіраваць нашай краінай, каб яны атрымалі законную ўладу ды згодна з Тваёй воляй маглі мудра і справядліва кіраваць давераным ім людам.

Праз Хрыста, Госпада нашага, амін.

Малітва 2 — Малітва «Хрысціянскай візіі», у сшытку пазначана як «Малітва за Беларусь (ад праваслаўных вернікаў)».

Айцец усіх людзей, Магутны Божа і Творца! Ты не пакінуў свет без клопату, але з любові паслаў Сына Свайго, каб адкрыць нам шлях у Тваё Царства і вызваліць ад улады граху, зла, пекла і смерці!

Ты спасылаеш Духа Твайго, каб асвяціць свет, каб сэрцы павярнуліся да Цябе, вочы бачылі праўду, вушы чулі голас сумлення, вусны дабравесцілі, рукі чынілі дабро і ногі хадзілі шляхам справядлівасці.

Ты стварыў Царкву, каб людзі працягвалі ў свеце справу Царства Твайго ― справу міру і справядлівасці, справу дзейснай любові, якая ацаляе раны, справу непахіснай надзеі, якая ўмацоўвае дух.

Дабравесце Тваё, Госпадзе, ― дабравесце міру, неаддзельнага ад справядлівасці, праўды, свабоды і любові. Каб запанаваў мір, патрэбна наша судзеянне Табе, умацуй нас у гэтай місіі ласкаю Тваёю.

Твой подых, Госпадзе, ― подых свабоды; Ты стаіш на баку прыгнечаных, а не прыгнятальнікаў. Вызвалі нас ад гвалту і прыгнёту ― і не дай нам ужываць свабоду дзеля злога і дзеля заняволення іншага.

Ты, Госпадзе, любіш тых, хто чыніць справядлівасць! Дай нам сумленне і розум, адрозніць дабро ад зла, праўду ад няпраўды, і ўмацуй у жаданні змагацца за справядлівасць.

Молімся за кожнага, хто прайшоў праз гвалт, зняволенне, прыніжэнне, пераслед і катаванні, Госпадзе, ацалі іх, умацуй іх, дай ім сілы пераадолець страх, пашлі ім падтрымку і дапамогу.

Молімся таксама за тых, хто чыніць зло і несправядлівасць: Госпадзе, ацалі іх сэрцы ад жорсткасці і нячуласці і прывядзі да пакаяння.

Молімся Табе, Госпадзе, за беларускія цэрквы, каб яны ўсведамлялі сваю місію і ў еднасці, салідарнасці і ахвярнасці — шукалі праўды Тваёй, выконвалі волю Тваю і былі супрацоўнікамі Царства Твайго — Айца, Сына і Святога Духа, цяпер, і заўсёды, і навекі вякоў. Амін.

Малітва 3.

Божа (Пане), Ты бачыў пакуты і смерць усіх несправядліва зняволеных у сталінскіх лагерах сыноў і дачок Беларускай зямлі — ксяндзоў Адама Станкевіча, Язэпа Германовіча, айцоў Фабіяна Абрантовіча, Андрэя Цікоты, сястры Ванды Банішэўскай і шматлікіх іншых.

Ты заўсёды застаешся побач з кожным нявінным сэрцам у час гвалтоўнага зняволення. Ты сам зведаў пакуты і знявагі за кратамі, гвалт і здзекі з Тваёй чалавечай і Боскай годнасці.

Ты, як ніхто іншы, ведаеш, што нявінныя пакуты за праўду і любоў вядуць да ўваскрасення душы і цела.

Ты запрашаеш кожнага ахвяраваць свае пакуты Табе, аддаць сваю роспач у Твае клапатлівя рукі, давярацца Тваёй міласэрнай любові.

Божа (Пане), просім, няхай кожны несправядліва зняволены знойдзе супакой і надзею ў Табе, наш Збаўца, а вінаватыя ў злачынствах прынясуць ахвяру сапраўднага пакаяння і навяртання.

Асвяці Сваім святлом гэтыя дні выпрабавання, каб зняволенне стала для вязняў дабраслаўлёным часам сустрэчы з Табою, дарогаю, праўдаю і жыццём. Амін.

Малітва 4. Малітва за Беларусь.

Айцец наш нябёсны, прашу Цябе ў імя Сына Твайго Ісуса Хрыста, пачуй маю малітву.

Дабраславі маю краіну Беларусь. Адвядзі ўсякую небяспеку, знешнюю і ўнутраную. Спыні гвалт і беззаконне. Хай на маёй зямлі не льецца кроў.

Хай усялякае зло будзе спыненае і пакаранае, хай кожны грэшнік і злачынца пакаецца.

Хай усякая справядлівасць будзе ўзноўленая.

Хай кожны, што пакутуе нявінна, будзе ацэнены.

Хай кожны, хто без віны кінуты за краты, выйдзе на свабоду.

Малюся за ўлады: дай нам праведных і мудрых кіраўнікоў, якія будуць клапаціцца пра народ, абараняць слабых і чыніць справядлівасць.

Малюся за незалежнасць нашай краіны: захавай і ўмацуй яе.

Малюся за Народ, за яго пакаянне, прыняцце Цябе як Госпада і Збаўцы.

Малюся за шчаслівую будучыню для Беларусі.

У імя Айца і Сына і Святога Духа. Амін.