Малітва за мір

Магутны Божа!

Мы, Твае дзеці, усклікаем да Цябе, Айца ўсіх людзей, Бога любові, міру, праўды і справядлівасці!

Праз прарока Твайго Ты сказаў – “Сын мой! Калі будуць грэшнікі схіляць цябе, кажучы: “Хадзем з намі, жывымі праглынем іх, як прадонне, набярэм усялякай каштоўнай маёмасці…”, Сын мой, не хадзі з імі, устрымай нагу сваю ад іх шляхоў, бо ногі іх бягуць да зла, спяшаюцца да праліцця крыві”.

Госпадзе, забарані тым, хто спяшаецца рабіць зло і праліваць кроў! Падмацуй тых, хто не хоча ўдзельнічаць у справах цемры, а хоча захаваць сваё сумленне чыстым перад Табой і людзьмі! Захавай усіх, хто абараняе сваю краіну!

Натхні дзейсна заклікаць да міру ўсіх, хто павінен гэта рабіць, не азіраючыся на моцных гэтага свету!

Божа Усемагутны! Дай розум тым, хто яго страціў, умацуй нямоглых, ацалі параненых, дай суцяшэнне усім, хто пакутуе, прытулак тым, у каго няма дзе схіліць галаву, накармі галодных і ўсім нам дай ласку бачыць у бліжніх брата ці сястру.

Стрымай зло, якое памножылася ў гэтыя дні, захавай душы і целы створаных паводле Твайго вобразу, ад усякага разбурэння.

Госпадзе, не аддай нас у рукі смерці і пекла.

Ты Творца гісторыі народаў і Кіраўнік чалавечых лёсаў! Божа наш, падары нам мір Твайго Царства, у якім ніколі не агаляецца ніводзін меч, апроч мяча праўды, і не ўздымаецца ніякая сіла, апроч сілы любові.

Ты Бог літасці, міру, праўды і любові, пачуй нас, выслухай і памілуй, каб у аднадумнасці, міры і браталюбстве мы славілі велічнае імя Тваё, Айца, Сына і Святога Духа. Амін.