У Чырвоны касцёл пусцілі святароў: сапраўдны стан храму не адпавядае заявам уладаў

Гэта адбылося 14 лютага. Наведаць святарам святыню дазволіла КУП “Мінская спадчына”, якое з’яўляецца ўласнікам будынку. Пасля візіту святары і прадстаўнікі касцёльнага камітэту адзначылі, што “ў касцеле цёпла, ёсць гарачая і халодная вада (на плябаніі ўсё гэта адключана), у зале для Богаслужэння няма слядоў узгарання, сажы і іншых бачных пашкоджанняў”. Да такой самай высновы прыйшла таксама камісія са святароў, якая змагла патрапіць унутр храма ў папярэдні раз — у снежні мінулага году.

У той жа час Мінгарвыканкам сцвярджае, што ў храме адключана электра-, цепла- і водазабеспячэнне, і што ўсе гэтыя сістэмы нібыта патрабуюць рамонтна-аднаўленчых прац. Гэта названа прычынай таго, чаму храм дагэтуль не адкрываюць для вернікаў. Разам з тым, не называюцца ні віды, ні тэрміны нібыта “неабходных” прац .

“Хрыстос залікае падаць руку сваім крыўдзіцелям”, — адзначылі парафіяне ў чарговым лісце да старшыні Савета Рэспублікі Н. Качанавай. Аднак ніякага адказу не атрымалі ані на гэтае паведамленне, ані на просьбы вярнуць святыню, скіраваныя да былога прадстаўніка Беларусі ў Ватыкане С. Алейніка і да мітрапаліта Веніяміна.

Ноччу 26 верасня ў закрыстыі Чырвонага касцёла адбыўся інцыдэнт з выбітым акном і ўзгараннем. З таго часу па распараджэнні ўладаў храм быў закрыты і знаходзіцца ў такім стане ўжо на працягу 5-ці месяцаў.

Відавочна, што інцыдэнт, расследаванне якога па нейкіх прычынах так і не завершылася, стаў толькі нагодай для закрыцця аднаго з самых пазнавальных храмаў беларускай сталіцы, а такім чынам з’яўляецца праявай ціску ўладаў на Каталіцкі касцёл у Беларусі.