Стала вядома пра яшчэ аднаго верніка, які прайшоў праз беларускую калонію

Былы палітвязень Уладзімір Гарох у вялікім інтэрв’ю распавёў, што ён вернік-пратэстант з пяцідзясятнікаў. Да 2020 года ён пісаў вершы, музыку і песні хрысціянскага фармату; частка ягоных вершаў пазней увайшла ў «Турэмны зборнік твораў беларускіх палітвязняў».

Да палітычных падзей Гарох працаваў у псіханеўралагічным інтэрнаце і, паводле яго словаў, менавіта там на ўласныя вочы бачыў, як дзяржаўная сістэма пакідае без належнай дапамогі самых безабаронных людзей. Ён кажа, што ў яго заўсёды было абвостранае пачуццё справядлівасці — і ў 2020 годзе гэта прывяло яго да ўдзелу ў пратэсце.

У зняволенні Гарох прайшоў праз ШІЗА, ПКТ, збіццё і суседства з камерай Вітольда Ашурка ў апошнія дні яго жыцця. Пасля вызвалення ён апынуўся ў вымушанай эміграцыі, страціў маёмасць, але ў інтэрв’ю кажа, што не хоча жыць у ролі ахвяры: «Я хачу справядлівасці».