Святлана Ціханоўская сустрэлася з мітрапалітам Варшаўскім, кардыналам Казімірам Нычам

Лідарка абмеркавала з іерархам рэлігійныя рэпрэсіі ў Беларусі, неабходнасць падтрымкі Касцёла і ўсіх хрысціян якіх пераследуе беларускі рэжым. Былі выказаны словы падзякі за дапамогу беларусам якія знаходзяцца ў Польшчы, за арганізацыю каталіцкіх службаў па-беларуску.

Святлана Ціханоўская падкрэсліла, што хрысціянскія лідары, у тым ліку каталіцкія біскупы Беларусі, знаходзяцца пад пастаянным ціскам. Было ўзгадана закрыццё касцёла св. Сымона і Алены ў Мінску, затрыманне каталіцкіх і служыцеляў іншых Цэркваў. Толькі цягам апошніх 2 гадоў каля 10 ксяндзоў былі змушаны пакінуць Беларусь, з іх палова палякаў. Ціханоўская звярнулася да кардынала з просьбай праяўляць салідарнасць з мясцовымі хрысціянамі ў публічным полі.

Лідарка беларусаў распавяла пра руйнаванне польскіх каталіцкіх могілкаў у Беларусі мясцовымі ўладамі. Яна падкрэсліла, што біскупы Беларусі не выказваюцца з гэтай нагоды, таму што ў склаўшыхся ўмовах гэта небяспечна і можа справакаваць дадатковыя рэпрэсіі.

Святлана Ціханоўская звярнулася да кардынала Ныча з просьбай у спрыянні арганізацыі беларускай парафіі ў Варшаве. Як прыклад яна ўзгадала беларускую парафію ў Вільні. Таксама Ціханоўская прыгадала, што нягледзячы на агульны прыхільны падыход да беларусаў у Польшчы, у некаторых гарадах беларусы-католікі пакуль маюць фармальныя цяжкасці ў арганізацыі малітвы па-беларуску.

У рамах Дня Дапамогі Касцёлу на Усходзе, які праходзіць у першую нядзелю Адвэнту, Ціханоўская і кардынал Ныч абмеркавалі арганізацыю малітвы за Беларусь. Іерарх пагадзіўся падтрымаць дадзеную акцыю.

Фота: прэс-служба Святланы Ціханоўскай