Рэакцыя цэркваў на перастрэлку ў кватэры на Якубоўскага была мінімальная

Тыдзень таму ў Мінску адбылася перастрэлка, у якой загінулі праграміст Андрэй Зэльцар і супрацоўнік КДБ Зміцер Федасюк. Гэтая трагедыя стала чарговай траўмай для беларускага грамадства. Нават каментаваць яе ў цяперашніх умовах аказалася небяспечным. Асэнсаванне гэтай падзеі ўскладняецца тым, што мы дагэтуль вельмі мала ведаем, што менавіта адбылося ў кватэры на вуліцы Якубоўскага 28 верасня.

Рэакцыя цэркваў на гэтую трагедыю была мінімальная. Паводле Sputnik, 1 кастрычніка ў мінскім храме Ўсіх святых адбылося адпяванне Змітра Федасюка, але фотаздымкаў з гэтай службы партал не публікуе, а на сайце храма навінаў пра гэтую падзею няма. Пра адну незвычайную сітуацыю паведамляе гомельскі партал Флагшток – у адным з праваслаўных прыходаў Светлагорска прайшла ліція за “загінулага воіна Дзмітрыя”, на якую сабралася нешматлікая група мясцовых чыноўнікаў і сілавікоў. Падаецца, што гэтая падзея была выключна мясцовай ініцыятывай – пра падобныя малітвы ў іншых месцах нічога не вядома.

Таксама трагедыю пракаментавалі ксёндз Вячаслаў Барок і тэлеграм-канал “Каталіцкае Адраджэнне”. Паводле ксяндза Барка, “Апакаліптычны звер, якім уяўляецца рэжым беззаконнай палітычнай улады, як бачым, не шкадуе нікога” і “ўсе беларусы, не залежна ад нашых поглядаў, а нават ад адсутнасці такіх, з’яўляюцца закладнікамі краважэрнага рэжыму”. Ананімныя аўтары “Каталіцкага Адраджэння” каментуюць наступным чынам: “Яны абодва і Андрэй Зельцар і загінулы супрацоўнік КДБ Зміцер Федасюк – ахвяры рэжыму лукашэску. Мы ўжо неаднаразова падкраслялі, што наша адзінае выйсце – хрысціянская міласэрнасць”.