Ціск на Ігара Бараноўскага

Піша грэка-каталіцкі вернік Ігар Бараноўскі, рэдактар партала БГКЦ «Царква»:

«Сёньня, 30 сьнежня, у судзе Маскоўскага раёну г. Берасьця адбыўся разгляд адміністрацыйнай справы супраць мяне за рэпосты з рэсурса Бел-т, які прызнаны ўладамі экстрэмісцкім па арт. 19.11.

Перад гэтым матэрыялы справы суддзя двойчы адпраўляў на дапрацоўку. 28 сьнежня трэці раз перапісалі па-новаму пратаколы пра адміністрацыйнае парушэньне: 2 пратаколы за рэпосты з Бел-ту ў Фэйсбуку ад 27.07.2021 (уласна ў дзень, калі рэсурс прызналі экстрэмісцкім!) і яшчэ 10 пратаколаў за кожны рэпост да гэтай даты ў ліпені 2021 г.

29 ліпеня 2021 г. у мяне быў з санкцыі пракурора вобшук КГБ, і тады пасьля допыту і праверкі майго смартфона і кампутара ніякіх прэтэнзій да мяне не было. Але ў кастрычніку зьявіўся вельмі дзіўны ліст праваслаўнага мітрапаліта Веніяміна, які выклікаў пэўны рэзананс у хрысьціянскіх колах, дзе ўгледзелі небясьпеку ў рэлігійна-асьветніцкай дзейнасьці ўніятаў, сярод якіх асобна была згадана мая асоба і грэка-каталіцкая парафія ў Берасьці.

Вердыкт сёньняшняга суда нада мной — штраф 20 базавых (580 руб.), якія я павінен сплаціць на працягу месяцу. Дзякуй Богу — не 15 сутак, як цяпер атрымліваюць многія па гэтым артыкуле, бо я падхапіў вірус і быў трохі прыхварэўшы і напярэдадні суда яшчэ ляжаў у ложку. Дзякуй Богу — Новы год змагу сустрэць з блізкімі мне людзьмі.

Дзякую ўсім, хто ўвесь гэты час перажываў і маліўся за мяне, падтрымліваў у судзе! Мне было гэта важна.

Як і 2021 год, новы 2022 год, напэўна будзе няпростым для грамадзянскай супольнасьці Беларусі. Але хай Новы год будзе больш спакойным для ўсіх нас, хай надзея на годнае жыцьцё ў сваёй роднай краіне не згасае. Усім зычу здароўя і волі ў Новым 2022 годзе.»

Крыніца