Трансляцыя каталіцкай Імшы на беларускім радыё засталася, але не на ўсіх хвалях

Katolik.life ўдакладніў сітуацыю з нядзельнай трансляцыяй святой Імшы з мінскай архікатэдры. Раней з’явіласяінфармацыя, што Імша знікла з эфіру беларускага радыё, аднак пасля тлумачэнняў стала вядома: на першым канале Беларускага радыё яна па-ранейшаму выходзіць кожную нядзелю ў 8:15.

Блытаніна ўзнікла праз канал «Культура». Раней ён рэтрансляваў ранішнія праграмы першага канала: спачатку праваслаўнае «Духоўнае слова», потым навіны, а пасля — каталіцкую Імшу. Цяпер праваслаўная перадача на «Культуры» засталася, але замест Імшы ў гэты час гучыць класічная музыка.

З-за гэтага частка вернікаў, асабліва старэйшага ўзросту, магла чакаць трансляцыю на звыклай хвалі і не пачуць яе. Katolik.life прынёс прабачэнні за ранейшую памылковую інфармацыю і выказаў надзею, што Імша не толькі застанецца на першым канале, але і вернецца ў эфір «Культуры», каб вернікам было прасцей яе знайсці.