Біскупы Еўропы салідарныя з арцыбіскупам Тадэвушам Кандрусевічам
3 верасня на сайце Рады Канферэнцый Біскупаў Еўропы (РКБЕ), пленарная асамблея якой тры гады таму праходзіла ў Мінску, была апублікавана Адозва па справе арцыбіскупа Тадэвуша Кандрусевіча.
Адозва Прэзідыуму РКБЕ па справе арцыбіскупа Тадэвуша Кандрусевіча
З 31 жніўня Яго Эксцэленцыі Тадэвушу Кандрусевічу, арцыбіскупу Мінска-Магілёўскаму і Старшыні Канферэнцыі Каталіцкіх Біскупаў у Беларусі, які вяртаўся з паездкі ў Польшчу, дзе браў удзел у святкаваннях у гонар Маці Божай Чэнстахоўскай, перашкаджаюць вярнуцца на Радзіму.
Прэзідыум РКБЕ выказвае салідарнасць усяго еўрапейскага епіскапту з арцыбіскупам Кандрусевічам і Касцёлам на Беларусі ў гэты балючы момант і падзяляе заклік Папы Францішка «да дыялогу, да спынення гвалту і да павагі справядлівасці і законнасці». Таксама разам з Папам мы давяраем «усіх беларусаў абароне Найсвяцейшай Панны Марыі, Каралевы супакою».
Запэўніваючы ў сваёй малітве за ўзлюбленага пастыра і за ўсю беларускую супольнасць, жадаем Мінска-Магілёўскаму арцыбіскупу неадкладнага вяртання дадому і да свайго біскупскага служэння, а таксама заахвочваем усіх дбаць пра мірнае вырашэнне канфлікту і з даверам ісці наперад шляхам дыялогу дзеля дабра чалавека і ўсяго грамадства.
Санкт-Гален, 3 верасня 2020 г.
