Біскуп Казімір Велікаселец: «Сёлета не ў кожнай сям’і велікодная радасць будзе поўнай»

Са звароту біскупа Казіміра Велікасельца на Вялікдзень:

«Дарагія браты і сёстры!

Я хачу падзяліць з вамі радасць уваскрасення Пана, але разумею, што сёлета не ў кожнай сям’і велікодная радасць будзе поўнай. Горача прашу Бога, каб Ён у сваёй міласэрнасці дапамог усім нам — пастырам і вернікам — супрацьстаяць выклікам нашага часу. Кожная цемра змяняецца святлом. Разам з вамі малюся аб гэтым святле.

Беларуская паэтка Ларыса Геніюш у адным са сваіх вершаў напісала: «Хрыстос уваскрос з крыві і болю, каб светач праўды не пагас».

Няхай не пагасне праўда ў нашым грамадстве, няхай яно ідзе за Хрыстом, бо Ён — «дарога і праўда, і жыццё» (пар. Ян 14, 6).»

Ларыса Геніюш — праваслаўная верніца, сябра ўраду БНР у міжваеннай эміграцыі, прайшла праз ГУЛАГ, адмовілася прыняць савецкае грамадзянства.