Сёння, на палове шляху паміж «заходнім» і «усходнім» Раством, адзначае свой сорак пяты дзень народзінаў лідэр Беларускай хрысціянскай дэмакратыі, вязень сумлення Павел Севярынец.

Усё, што мы ведаем пра абставіны зняволення Севярынца, кажа, што перад абліччам зла і няпраўды ён паводзіў сябе бездакорна. Аўтар воклічу «Верым! Можам! Пераможам!» ужо маральна перамог рэпрэсіўную сістэму, якая ўбачыла ў яго асобе небяспеку для свайго існавання.

Думкі і малітвы сяброў «Хрысціянскай візіі» сёння са спадаром Паўлам, яго жонкай Вольгай і сынам Францішкам, сястрой Ганнай, маці Таццянай. А таксама сынам Янкам і бацькам Канстанцінам, якія зараз — верым — знаходзяцца ў Нябесным Валадарстве.

Мы жадаем усім Севярынцам здароўя, сіл і мужнасці.

Молімся аб тым, каб наступны дзень народзінаў Павел Севярынец адсвяткаваў на свабодзе ў вольнай Беларусі.

Пішыце лісты Паўлу Севярынцу на адрас: ПК №17. 213004, г. Шклоў, вул. 1-я Заводская, 8.