Вядомы прысуд ксяндзу з Валожына — ён уражвае сваёй жорсткасцю
Мінскі абласны суд асудзіў ксяндза Генрыха Акалатовіча, пробашча з Валожына, на 11 гадоў калоніі ўзмоцненага рэжыму па абвінавачанні ў «здрадзе дзяржаве». Суд праходзіў у закрытым рэжыме, дэталі справы не агалошваюцца.
64-гадовага святара, які мае цяжкія хваробы, затрымалі больш за год таму.
Падчас працэсу ніхто з епіскапату і прадстаўнікоў Нунцыятуры не прысутнічаў. Вернікі адзначаюць страх як прычыну непрысутнасці святароў, піша katolik.life.
Ксёндз Генрых вядомы сваёй дапамогай у адраджэнні Каталіцкай Царквы ў Беларусі і вернасцю беларускай мове. На судзе ён заяўляў пра сваю невінаватасць і прасіў не спыняць малітвы.
