Дэпутат Сейма Латвіі Юргіс Клоціньш, прадстаўнік Нацыянальнага аб’яднання, далучыўся да міжнароднай кампаніі #WeStandBYyou і абвясціў пра шэфства над асуджаным у Беларусі святаром Генрыхам Акалатовічам.

У сваёй заяве Клоціньш адзначыў:

«Святар Генрых Акалатовіч адстойвае гэтыя правы ў Беларусі, кіраванай аўтарытарным рэжымам. Я ўдзельнічаю ў межах кампаніі #WeStandBYyou і бяру над ім шэфства як палітык і як хрысціянін. Я ведаю, наколькі важная свабода веравызнання. У гісторыі маёй краіны былі пастары, святары і простыя вернікі, што не пабаяліся стаць на абарону праўды пры таталітарызме — гэтак жа, як святар Генрых. Яны адстойвалі права латвійскага народа на ўласную незалежную дзяржаву і свабоду вызнаваць веру ў Ісуса Хрыста, які, як вераць хрысціяне, з’яўляецца Госпадам над усімі чалавечымі ўладамі і ўрадамі. Адным з іх быў паважаны біскуп Баляслаў Слосканс, які служыў дапаможным біскупам Рыжскай архідыяцэзіі ды апостальскім адміністратарам Магілёва і Мінска. Яго жыццёвы шлях мае вялікае духоўнае значэнне як для Латвіі, так і для Беларусі».

Генрыха Акалатовіча, якога асудзілі на 11 гадоў зняволення за «дзяржаўную здраду», у траўні 2025-га ўнеслі ў пералік «экстрэмістаў». Ён не прызнае сваёй віны і называе справу «правакацыяй».